КОРРУПСИЯ – ЗАХМИ ҶОМЕА

Коррупсия - яке аз мушкилоти ҷиддитарини ҷомеаи муосир ба ҳисоб меравад, ки ба рушди устувори давлат, иқтисодиёт ва низоми иҷтимоӣ таъсири манфӣ мерасонад. Он эътимоди шаҳрвандонро ба мақомоти давлатӣ коҳиш дода, самаранокии идоракуниро паст мекунад ва ба татбиқи ислоҳоти давлатӣ монеа мегардад. Дар шароити ҷаҳонишавӣ ва мураккабшавии муносибатҳои иҷтимоӣ, мубориза бо коррупсия аҳамияти аввалиндараҷа пайдо мекунад.

Дар Ҷумҳурии Тоҷикистон мубориза бо коррупсия ҳамчун самти муҳими сиёсати давлатӣ баррасӣ мегардад. Тибқи Қонуни Ҷумҳурии Тоҷикистон «Дар бораи муқовимат ба коррупсия», коррупсия ҳамчун истифодаи ғайриқонунии ваколатҳои хизматӣ бо мақсади ба даст овардани манфиати шахсӣ ё гурӯҳӣ шарҳ дода мешавад. Ин қонун заминаи ҳуқуқии пешгирӣ, ошкор ва бартараф намудани амалҳои коррупсиониро фароҳам меорад.

Сабабҳои пайдоиши коррупсия гуногунанд. Аз ҷумла, паст будани сатҳи маърифати ҳуқуқӣ, камбуди шаффофият дар раванди идоракунӣ, мураккабии расмиёти маъмурӣ ва дар баъзе ҳолатҳо омилҳои инсонӣ метавонанд боиси ба вуҷуд омадани чунин падида шаванд.

Пайомадҳои коррупсия барои ҷомеа хеле вазнин мебошанд. Он боиси нобаробарии иҷтимоӣ, паст шудани сифати хизматрасониҳои давлатӣ ва кам шудани эътимоди мардум ба давлат мегардад. Илова бар ин, коррупсия ба рушди иқтисодӣ таъсири манфӣ расонида, ҷалби сармоягузорони хориҷиро маҳдуд месозад.

Ҳукумати Ҷумҳурии Тоҷикистон дар самти мубориза бо коррупсия як қатор чораҳои муассирро амалӣ менамояд. Аз ҷумла, Стратегияи миллии муқовимат ба коррупсия барои давраи то соли 2030 қабул гардидааст, ки ҳадафи асосии он баланд бардоштани шаффофият, таҳкими низоми идоракунии давлатӣ ва коҳиши омилҳои коррупсионӣ мебошад.

Дар маҷмӯъ, коррупсия на танҳо мушкилоти ҳуқуқӣ, балки падидаи мураккаби иҷтимоӣ, иқтисодӣ ва ахлоқӣ мебошад, ки ба пояҳои устувори давлатдорӣ ва рушди ҷомеа таҳдид мекунад. Танҳо дар сурати ташаккули тафаккури зиддикоррупсионӣ, баланд бардоштани маърифати ҳуқуқии шаҳрвандон метавон ба коҳиши воқеии ин падида ноил гардем.

Аз ин рӯ, ояндаи устувори кишвар ба сатҳи масъулиятшиносӣ ва бетараф набудани ҳар як аъзои ҷомеа дар муқовимат бо коррупсия вобаста мебошад.

Умарзода Мадиёр Хайрулло

Сардори шуъбаи Агентии меҳнат ва шуғли аҳолӣ дар ноҳияи Сино